आजच्या डिजिटल युगात मोबाईल रिचार्ज आणि UPI पेमेंटसाठी इंटरनेट आवश्यक बनले आहे. इंटरनेटशिवाय या सेवांचा वापर करणे जवळपास अशक्य आहे. परिणामी, इंटरनेट डेटा पॅक ही आता प्रत्येकाची मासिक गरज बनली आहे. मात्र, गेल्या काही महिन्यांत एअरटेल आणि जिओने त्यांच्या रिचार्ज व डेटा प्लॅनमध्ये सुमारे 20% वाढ केल्याने ग्राहकांमध्ये असंतोष निर्माण झाला आहे. या दरवाढीमुळे अनेकांनी पर्याय म्हणून BSNL कडे वळण्याचा विचार केला आहे.
स्वस्त दरात उत्तम सेवा देण्यासाठी BSNL ने एक नवीन वार्षिक प्लॅन आणला आहे, जो तुमच्यासाठी फायदेशीर ठरू शकतो. या प्लॅनमध्ये, 365 दिवसांच्या कालावधीसाठी 2999 रुपयांचा रिचार्ज करावा लागतो. या वार्षिक प्लॅनमध्ये दररोज 3 GB डेटा, अनलिमिटेड कॉलिंग, रोमिंग कॉलिंग आणि दररोज 100 एसएमएस मिळतात. डेटा लिमिट संपल्यानंतर इंटरनेटचा स्पीड 40 kbps पर्यंत कमी होतो, ज्यामुळे तुम्ही कमी वेगाने इंटरनेट वापरू शकता.
BSNL सध्या देशभरात 4G सेवा सुरू करण्याच्या तयारीत आहे. यासाठी कंपनीने टाटाच्या मदतीने डेटा सेंटर उभारले असून, TCS ने या कामाची सुरुवात केली आहे. लवकरच, BSNL चं 4G नेटवर्क देशभरात उपलब्ध होईल, ज्यामुळे ग्राहकांना कमी किंमतीत वेगवान इंटरनेट सुविधा मिळू शकेल. या सेवेची लवकरात लवकर सुरूवात करण्याची मागणी युजर्सनी केली आहे.
केंद्र सरकारनेही BSNL च्या 5G नेटवर्कला मंजुरी दिली आहे. सध्या, 5G नेटवर्कच्या स्थापनेसाठी काम सुरू आहे. एअरटेल आणि जिओच्या दरवाढीनंतर ग्राहकांना महिन्याला अधिक पैसे मोजावे लागत आहेत, अशा परिस्थितीत BSNL ने कमी दरात चांगले प्लॅन्स उपलब्ध करून दिले आहेत. हे 5G नेटवर्क लवकरच सुरू झाल्यास, BSNL च्या युजर्सची संख्या लक्षणीय वाढू शकते. विशेष म्हणजे, केंद्रीय मंत्री ज्योतिरादित्य शिंदे यांनी स्वतः BSNL च्या 5G नेटवर्कवरून कॉलिंग करून या सेवेची गुणवत्ता तपासली आहे.
आता, नेटीझन्सचं लक्ष पुन्हा BSNL कडे वळलं आहे. पुढील वर्षापर्यंत, BSNL ची 4G आणि 5G सेवा देशातील मेट्रो सिटींमध्ये सुरू होईल अशी अपेक्षा आहे. BSNL कडून सध्या स्वस्त आणि चांगल्या दर्जाच्या सेवा देण्याचा प्रयत्न केला जात असून, यामुळे ग्राहकांना कमी किंमतीत चांगली सेवा मिळण्याची शक्यता आहे.
या सर्व गोष्टींमुळे, BSNL चे प्लॅन्स तुमच्यासाठी एक चांगला पर्याय ठरू शकतात, विशेषतः ज्या युजर्सना कमी दरात उत्तम सेवा हवी आहे त्यांच्या दृष्टीने हा प्लॅन फायदेशीर ठरू शकतो.